Moot Court “Siguria Ushqimore dhe Mbrojtja e të Drejtave të Konsumatorëve”

By /

Maj – Qershor 2026

Pjesëmarrës gjatë një seance të Moot Court në një sallë me tavolina të rregulluara dhe banderolën e projektit SAFECons

U përmbyll me sukses Moot Court "Siguria Ushqimore dhe Mbrojtja e të Drejtave të Konsumatorëve", i pari në llojin e tij. Aktiviteti u shtri në tre faza dhe solli së bashku studentë e pedagogë nga disa universitete të vendit, të cilët u përballën përmes simulimit të Zgjidhjes Alternative të Mosmarrëveshjeve.

Një format inovativ i bazuar në zgjidhjen alternative të mosmarrëveshjeve

Në konkurrim morën pjesë 10 ekipe, secili i përbërë nga 3 studentë dhe 1 pedagog përfaqësues, nga universitete të ndryshme të vendit:

  • Universiteti i Durrësit
  • Universiteti i Elbasanit
  • Universiteti Bujqësor i Tiranës
  • Universiteti EPOKA
  • Kolegji Universitar i Biznesit
  • Universiteti i Tiranës
Pamje e përgjithshme e sallës gjatë Moot Court, me jurinë, ekipet dhe banderolën SAFECons

Gjatë çdo përballjeje, njëri ekip përfaqësonte interesat e tregtarit, ndërsa pala tjetër mbronte të drejtat e konsumatorëve. Rolet e secilës skuadër u përcaktuan me short.

Kazuset praktike, të bazuara në një çështje reale, iu dërguan ekipeve paraprakisht, duke u dhënë mundësinë të përgatiteshin mbi bazën e legjislacionit përkatës dhe të ndërtonin argumentimin juridik të secilës palë. Gjatë seancave, ekipet paraqitën kërkesat, pretendimet dhe argumentet e tyre, të mbështetura në kuadrin ligjor në fuqi.

Juria e Moot Court në tavolinën e vlerësimit, me banderolën SAFECons dhe ekipet konkurruese

Si u vlerësuan ekipet

Çdo përballje, në secilën nga tre fazat, u vlerësua nga një juri profesionale me tre anëtarë, mbi bazën e kritereve të përcaktuara në Rregulloren e Moot Court, e cila u ishte dërguar ekipeve përpara fillimit të Fazës I. Vlerësimi u mbështet në:

  • përgatitjen profesionale;
  • bazën ligjore të argumentimit;
  • aftësinë e bashkëpunimit në ekip;
  • etikën profesionale gjatë paraqitjes;
  • kriteret e tjera të përcaktuara në rregullore.

Faza I — Siguria ushqimore

Në Fazën I, ekipet u përballën me njëri-tjetrin në pesë përballje mes dy skuadrave.

Rasti: Një familje kishte blerë një produkt ushqimor të etiketuar "BIO". Brenda pak ditësh, si rezultat i konsumit, familja shfaqi probleme shëndetësore. Ata u ankuan dhe u kryen inspektime nga Autoriteti Kombëtar i Ushqimit. Çështja vazhdon…

Ekipe studentore duke ndjekur seancën e Moot Court, me banderolën SAFECons në sfond

Nga 10 ekipet konkurruese, juria përzgjodhi 6 ekipet me pikët më të larta për të vijuar në Fazën II.

Faza II — Paketat turistike

Në Fazën II konkurruan 6 ekipet që kaluan Fazën I.

Rasti: Një familje kishte blerë një paketë turistike pranë një agjencie turistike, me qëndrim njëjavor në një hotel me katër yje, me shërbime "Full Board". Gjatë qëndrimit, konsumatorët u përballën me vështirësi në përdorimin e shumë shërbimeve për shkak të fluksit të turistëve, me mbylljen e pishinës për shkaqe sigurie dhe cilësie të ujit, si dhe me problematika të lëkurës tek fëmija i familjes, për të cilat u ngrit shqetësimi se lidheshin me cilësinë e ujit të pishinës. Çështja vazhdon…

Dy ekipe përballë njëri-tjetrit gjatë Moot Court, me fletën e vlerësimit mbi tavolinë

Nga 6 ekipet konkurruese, juria përzgjodhi 2 ekipet me pikët më të larta për të vijuar në Fazën III, Finale.

Faza III, Finalja — Kredia konsumatore

Në fazën finale kaluan 2 ekipe:

  • Fakulteti i Drejtësisë, Universiteti i Tiranës;
  • Fakulteti i Biznesit dhe i Drejtësisë, Universiteti i Elbasanit.
Ekipi finalist i Fakultetit të Drejtësisë, Universiteti i Tiranës, gjatë fazës finale të Moot Court
Ekipi finalist — Fakulteti i Drejtësisë, Universiteti i Tiranës.

Rasti: Një çift bashkëshortësh lidhi një kontratë kredie konsumatore në kuadër të një oferte promocionale për financim edukimi. Kontrata u lidh me procedurë të përshpejtuar, mbështetur në vetëdeklarimet e konsumatorëve, të cilët dorëzuan deklarime të pavërteta për të ardhurat. Megjithëse sistemi i brendshëm i bankës sinjalizoi mospërputhje dhe një nivel të moderuar risku, banka nuk ndërmori verifikime të mëtejshme. Pas disbursimit, fondet nuk u përdorën për qëllimin e deklaruar të edukimit, por për investim në pasuri të paluajtshme dhe shpenzime personale. Pas rreth tetë muajsh, konsumatorët nuk vijuan me pagesat e kësteve. Vazhdon…

Ekipi fitues

Fitues i Fazës III dhe i Moot Court "Siguria Ushqimore dhe Mbrojtja e të Drejtave të Konsumatorëve" u shpall ekipi përfaqësues nga Fakulteti i Drejtësisë, Universiteti i Tiranës.

Pjesëmarrësit e Moot Court me certifikata në duar gjatë ceremonisë përmbyllëse
Momenti i ndarjes së certifikatave në përfundim të aktivitetit.

Falënderime

Falënderojmë me vlerësim për punën dhe përkushtimin e treguar të gjithë pjesëmarrësit në këtë aktivitet!

Fotografi grupi e organizatorëve dhe pjesëmarrësve para banderolës së projektit SAFECons Fotografi grupi e pjesëmarrësve në aktivitetin Moot Court të projektit SAFECons Fotografi grupi e pjesëmarrësve dhe organizatorëve të Moot Court Fotografi grupi e ekipeve dhe organizatorëve para banderolës SAFECons Dy ekipe studentore në tavolinat konkurruese gjatë një përballjeje të Moot Court Ekipe konkurruese në tavolinat e tyre gjatë një seance të Moot Court Juria dhe ekipet gjatë një përballjeje të Moot Court në sallën e hotelit Ekipe studentore në tavolinat konkurruese gjatë Moot Court Ekipe konkurruese gjatë një seance të Moot Court në sallën e aktivitetit

Rreth projektit SAFECons

Ky aktivitet u realizua në kuadër të projektit "Shoqëria Civile në Veprim për Përpjekje të Koordinuara në Sigurinë Ushqimore dhe Mbrojtjen e Konsumatorëve – SAFECons", financuar nga Bashkimi Evropian dhe zbatuar nga Qendra Konsumatori Shqiptar (QKSH) dhe Qendra Burimore Kombëtare Shqiptare e Trajnimit dhe Asistencës Teknike (ANTTARC).

Scroll to Top